Orde van Advocaten van Aruba

EN | NL | PA
Informacion di estudio

Pa bira abogado, bo mester tin un titulo di "Meester (of Master) in Nederlands Recht" obteni na un universidad na Hulanda, of un titulo di Master obteni na Universidad di Aruba (UA), estableci na Aruba. UA ta ofrece les di lei Arubano. Tur persona cu kier traha na Aruba como abogado of hues, of eherce cualkier otro tipo di profesion huridico, mester domina lei Arubano y/of Hulandes.

Studiantenan di lei na e universidad aki ta wordo prepara como hurista "all-round". Esey ta encera cu ora bo completa bo estudio di lei, bo por traha riba un variedad di tereno. Ora bo obtene e titulo(nan) di "Bachelor of Law" y/of "Master of Law", como hurista lo bo ta capaz pa contesta un gran variedad di pregunta huridico cu bo ta topa diariamente.

Entrante e aña academico 2003-2004, UA a introduci e structura Bachelor-Master pa e estudio di Lei Arubano. E estudio di lei aki ta stimula un interes social amplio, capacidad analitico, un bon dominio di idioma Hulandes y placer di trata cu hende.

Si bo ta cumpli cu e exigencianan di admision, bo por inscribi pa medio di un formulario di inscripcion cu bo por tuma na bali di UA. Si bo no ta cumpli cu e exigencianan di admision, pero a cumpli 21 aña caba, Minister di Enseñansa por permiti bo participa na e examennan a base di e examen colloquium doctum. Mas informacion riba esaki ta obtenibel den e reglamento di Colloquium Doctum di Facultad di Derecho, cu bo por pidi na administracion di Universidad na J.E. Irausquinplein 4, Aruba.

Naturalmente, por studia derecho na Hulanda tambe. Por haci esey na Amsterdam, Leiden, Tilburg, Nijmegen, Groningen, Maastricht y Utrecht.

UA tin acuerdonan di cooperacion cu diferente universidad Hulandes. Tin palabracionnan concreto cu e universidadnan aki tocante dispensacion di tentamen pa studiantenan di UA, di manera cu si bo completa bo estudio na UA, ademas di bo Master di Derecho Arubano bo por obtene un Master di Derecho Hulandes tambe den relativamente poco tempo. Pa mas informacion, bay na www.ua.aw.

Ora un studiante completa su estudio y haya trabou na un oficina di abogado, su prome tres añanan trahando den abogacia ta conta como periodo di stage. Durante e periodo aki, bo ta traha como abogado si, pero bou di guia di un patron. Den e temporada aki bo por sigui un estudio no obligatorio (te ainda) di Formacion Profesional den Abogacia ("Beroepsopleiding Advocatuur").

Por haya mas informacion tocante e estudio di Formacion Profesional den Abogacia na e website di Stichting PAO: www.pao-aruba.com.