Tarifa
No ta existi tarifa fiho den abogacia. Debi cu no tin palabracion tocante prijs, e gastonan pa contrata asistencia huridico na Aruba por varia hopi. Loke abo como cliente tin cu paga ta depende di diferente factor. Por ehempel, e embergadura y nivel di complehidad di bo problema legal ta hunga un papel importante, y tambe e interesnan financiero envolvi, e grado di urgencia y e nivel di experiencia di e abogado en cuestion. Ta bon pa di antemano bo haci cierto palabracionnan cu bo abogado tocante e gastonan di bo caso y tocante ken lo ricibi e pago di gastonan legal despues cu hues dicidi cua partido mester haya nan, anto pone e palabracionnan aki por escrito. Te asina leu cu ta posibel, for di trempan bo abogado lo duna bo un aproximacion di e gastonan total y informa bo encuanto e consecuencianan financiero di tratamento di bo caso.
Normalmente un abogado lo pone su cliente na haltura na tempo di eventual desaroyonan nobo den e caso cu por resulta den trabou adicional, ya cu esey tambe por tin influencia riba e gastonan total.
Por lo general, un declaracion di gasto ta componi di e honorario, e gastonan adicional y BBO. E honorario ta e suma cu e abogado ta factura como pago pa su trabou. Den e honorario tin tambe gastonan di overhead, manera gastonan di personal y oficina. Den mayoria di caso, bo abogado lo declara un porcentahe fiho pa gastonan di oficina.
E gastonan adicional ta gastonan cu e abogado a haci pa e caso, manera gasto di griffie, deurwaarder, biahe y estadia, rolgeld y stampia. Ta distingui entre gastonan adicional pa cua mester paga BBO y esnan liber di BBO. E principal gastonan adicional liber di BBO ta gastonan di griffie (“leges” cu mester paga e griffier pa e procedura huridico) y cierto gastonan di deurwaarder. Semper tin cu paga BBO riba e honorario di e abogado. Ta existi diferente manera cu un abogado por haci su declaracion.
Como punto di salida, ora bo gana un caso, hues lo manda e otro partido compensa bo gastonan huridico. Ta yama esaki e ‘kostenveroordeling’ (otorgamento di compensacion di gasto). E compensacion di gasto aki ta consisti di gastonan di griffie, stampia, deurwaarder, gastonan relaciona cu posibel beslag preventivo cu bo a paga, ademas di e salario di e apoderado. En principio, tur e gastonan menciona anteriormente ta wordo inclui den e kostenveroordeling den nan totalidad, cu excepcion di salario di e apoderado, locual ta sirbi como pago (esta, compensacion) di bo gastonan di abogado. Di otro banda, e suma cu hues otorga como salario di apoderado ta basa riba un asina yama ‘liquidatietarief’ cu ta significativamente mas abou cu e tarifanan cu abogadonan ta cobra actualmente. Debi na esey, hasta si bo gana e caso y hues otorga compensacion di e gastonan, den mayoria di caso e compensacion di gasto lo no cubri e honorario real cu bo mester paga bo abogado, y abo mes lo tin cu cubri un parti.
Ta existi diferente manera cu un abogado por haci su declaracion:
Tarifa pa ora:
E sistema aki ta esun mas usual, esta, e cantidad di ora cu e abogado a dedica na e caso, multiplica cu su tarifa pa ora. Un oficina di abogado por aplica un tarifa fiho pa ora of diferente tarifa pa cada tipo di abogado, dependiendo di nan nivel di experiencia. Por mara e tarifa pa ora tambe na cierto factornan manera e grado di urgencia, e nivel di experiencia necesario pa e caso, y naturalesa y peso di e caso. Tambe ta posibel pa tene cuenta cu e cliente su forsa financiero ora di fiha e tarifa pa ora. Tambe por mar’é na resultado: un tarifa mas abou den caso cu no logra e meta, y uno mas halto den caso cu si logr’e. Como promedio, e tarifanan pa ora di e diferente oficinanan di abogado na Aruba ta entre 250 y 600 florin pa ora.
Hopi biaha, oficinanan mas chikito, cu un of dos abogado, ta aplica tarifa un tiki mas abou cu esnan mas grandi y cu mas abogado. Entre otro esaki tin di haber cu e hecho cu en principio un oficina chikito tin menos gasto di overhead. Di otro banda, e oficinanan mas grandi ta argumenta cu nan tin mas experiencia na nan disposicion y cu p’esey nan tin cu dedica menos ora na un caso.
Suma fiho:
E abogado y e cliente ta palabra un suma fiho di antemano pa tur e asistencia huridico den su totalidad.
Contract anual/”kaderafspraak”:
Den e caso aki, e cliente, den mayoria di caso un empresario, ta haci palabracionnan cu e abogado tocante e declaracionnan pa casonan cu mester trata. E acuerdo aki por inclui tarifa y posibel factornan, a base di experiencia cu a adkiri den casonan anterior. Aki tambe por tene cuenta cu factornan particular, manera urgencia, conocemento specialisa y e importancia y naturalesa di e caso.
Tarifa di cobransa:
Casonan relaciona cu cobransa di debe yama “caso di cobransa”. Specificamente ora cu un abogado ta trata varios caso di cobransa pareu, usualmente ta aplica un tarifa di cobransa, cu generalmente kier men cu e tarifa consisti di un cierto porcentahe di e suma cu mester cobra.
No cure no pay:
“No cure no pay” kier men cu e cliente no ta paga gasto di abogado, sino cu enbes di esey e honorario ta un porcentahe di loke e caso produci. Si perde e caso, e abogado no ta haya nada. Na cierto paisnan, manera Hulanda, e sistema di tarifa aki ta prohibi. Esey ta debi cu den un circunstancia asina e abogado tin un interes financiero personal si e gana e caso, loke por afecta e posicion independiente cu e mester mantene. Na Aruba si e forma di declara gasto aki ta permiti.
Un combinacion di e metodonan ariba menciona tambe ta posibel. Den un caso asina, e cliente lo yega na un palabracion di antemano cu e abogado tocante e pago a base di un porcentahe di e debe, comparabel na e tarifa di cobransa, pero, por ehempel, na luga di un acuerdo “no cure no pay” ta acorda un suma minimo (fiho) of un tarifa pa ora adapta. Sa aplica e metodo aki por ehempel den casonan di “letselschade”.
Scroll To TopMenu Principal
