Orde van Advocaten van Aruba

EN | NL | PA
Keho y disputa

Pa kehonan tocante un abogado, por acudi na Conseho di Supervision (Raad van Toezicht). Asina ta prescribi den Ordenansa di Abogacia (Advocatenverordening). Raad van Toezicht ta fungi como tribunal disciplinario pa abogadonan. Un keho asina por ta relaciona cu e manera cu e abogado a efectua su trabou of e suma cu el a declara.

E base pa evalua actuacion di abogadonan ta e Reglanan di Comportacion pa Abogadonan. Orden di Abogadonan di Aruba a formula e reglanan di comportacion aki, pero nan ta deriva di e reglanan di comportacion cu ta aplicabel na Hulanda. E reglanan aki ta di aplicacion general. Esey kier men cu abogadonan cu no ta miembro di e Orden di Abogadonan tambe mester tene nan mes na nan.

Raad van Toezicht ta facilmente accesibel y disponibel pa tur hende cu tin un keho relaciona cu un abogado. Un carta breve y cla, dirigi na secretario di e Raad, indicando nomber di e abogado y motibo di e keho mes ya ta suficiente. Si bo tin documentonan cu ta liga na e keho, mester inclui nan cu e carta. Despues tin cu entrega e documentonan na griffie di Husgado di Prome Instancia di Aruba.

No ta ciudadanonan so por entrega keho. Abogadonan tambe por recuri na e Conseho di Supervision pa resolve un diferencia di opinion cu un otro abogado.

E Conseho di Supervision ta consisti di un hues y dos abogado. Prome, ta duna esun cu tin keho e oportunidad pa expresa su  kehonan por escrito. Despues, Conseho di Supervision ta duna e abogado contra ken e keho ta dirigi e oportunidad di presenta un defensa por escrito. Riba termino corto lo tene un audiencia den cua tur dos partido por splica nan puntonan di bista den mas detaye. Tur dos partido por uza asistencia di un abogado. E audiencianan aki di e Conseho di Supervision ta publico, y e sentencianan di e Conseho tambe. Conseho di Supervision lo dicta sentencia denter di un termino di tempo rasonabel.

Si Conseho di Supervision ta di opinion cu e abogado a actua indebidamente, e por impone diferente sancion:

  • Un solo advertencia simpel
  • Un reprendemento
  • Un suspension di te cu un aña
  • Eliminacion for di "tableau" (lista oficial di abogadonan)

Den caso di un advertencia simpel of un reprendemento, e abogado por sigui eherce su trabou. Den caso cu impone un suspension temporal, durante un cierto periodo pre-estableci e abogado no mag traha. Durante e periodo di suspension, no ta admiti e abogadonan na asambleanan general di miembro di Orden di Abogadonan tampoco, esta, den caso cu e abogado en cuestion ta miembro.

Si elimin'e for di tableau, esey ta encera cu e no mag uza e titulo di abogado mas ni no mag eherce su profesion nunca mas.

Si e keho ta relaciona cu e suma declara, Conseho di Supervision por determina kico lo sirbi como un compensacion rasonabel den e caso specifico.

Si un di e partidonan no ta di acuerdo cu e sentencia di Conseho di Supervision, semper ta posibel pa denter di tres siman apela na Conseho di Apelacion (Raad van Appèl). E Conseho aki ta consisti di e Presidente di Corte Comun di Husticia y dos abogado di hopi trayectoria. Presidente di Corte Comun di Husticia por apunta otro hues cu experiencia tambe pa remplas'e.

Si un persona ta duda encuanto con serio su keho ta, of si e ta haya cu acudi na Conseho di Supervision ta un medida mucho pisa, e por acerca e decano di Orden di Abogadonan di Aruba via e-mail na Esta dirección electrónica esta protegida contra spambots. Es necesario activar Javascript para visualizarla pa mediacion y conseho.

Raad van Toezicht
p/a Het Gerecht in Eerste Aanleg van Aruba
J.G. Emanstraat nr 51
Oranjestad
Aruba

Telefoonnummer
+297 582 2294
Faxnummer
+297 582 1241