Orde van Advocaten van Aruba

EN | NL | PA
Legislacion y reglanan

Ki reglanan abogadonan mester cumpli cune? Ki autoridad un abogado tin? Tin regla di conducta pa abogado? Y si ta asina, ken ta pone nan cumpli cu e reglanan ey?

Por haya contesta pa e preguntanan aki den e Ordenansa di Abogacia (Advocatenverordening). E ordenansa aki ta describi tur derecho y deber di abogado. E ordenansa ta duna splicacion amplio di e reglanan cu tur abogado mester cumpli cune.

Tur abogado na Aruba mester inscribi na Corte Comun di Husticia di Aruba, Curaçao, St. Maarten, y di Boneiro, St. Eustatius y Saba y presta huramento den un sesion publico di Corte (§1).

Paragraf 2 ta trata e autoridad y obligacionnan di abogadonan. Un abogado ta autorisa pa defende interes di su mandantenan (lastgevers) den tur caso y pa tur autoridad na Aruba, y representa su mandantenan tur caminda cu esey no ta prohibi mediante ordenansa general.

Un abogado tin e obligacion di tene su administracion financiero di tal manera cu na tur momento por mira ki fondonan di terceronan e tin den su custodia, incluso den capacidad di curator of interventor. Mester deposita y tene e fondonan aki riba un cuenta apart.

Den e Ordenansa di Abogacia tin ademas henter un paragraf dedica na hurisdiccion disciplinario. Meta di hurisdiccion disciplinario ta di tuma medida contra erornan cu abogadonan comete den ehercicio di nan profesion y infraccionnan contra honor di abogacia. Den prome instancia un Conseho di Supervision (Raad van Toezicht) ta implementa e hurisdiccion disciplinario y den apelacion, un Conseho di Apelacion (Raad van Appèl). E Conseho ta evalua cumplimento cu e Reglanan di Conducta pa Abogado cu Orden di Abogadonan a formula. Pa mas informacion, lesa e capitulo tocante Keho y Disputa.

Tambe e Ordenansa di Abogacia ta trata salario di abogadonan. Paragraf 5 ta bisa: Abogadonan ta calcula e salario pa trabounan cu nan haci den tur caso legal, sin distincion, y tambe trabounan cu no ta relaciona cu caso legal, conforme e importancia, embergadura y nivel di complehidad di e caso, e dificultadnan envolvi y e tempo dedica na esey y dependiendo tambe di te na ki grado nan mester a bandona nan oficina of bibienda pa por tene nan deliberacionnan. Pa mas informacion, lesa e capitulo tocante Tarifa.

Abogadonan ta obliga di specifica e cuentanan cu nan ta presenta na nan clientenan, den caso cu e cliente pidi esey. Den caso di disputa relaciona cu e salario calcula, por envolve Conseho di Supervision. Pa mas informacion, lesa tambe e capitulo tocante Keho y Disputa.

E Ordenansa di Abogacia ta dedica dos paragraf na personanan cu no ta abogado, pero cu si ta fungi den cierto casonan como consehero y apoderado, haciendo esey como profesion.

E prome categoria ta consisti di conseheronan fiscal (§6). Un consehero fiscal mester ricibi un reconocimento por escrito como tal di Conseho di Apelacion pa Asuntonan Fiscal (Raad van Beroep voor Belastingzaken) prome cu e por eherce e profesion ey. Ta reconoce e persona den caso cu su comportacion social ta bon na opinion di Conseho di Apelacion pa Asuntonan Fiscal, y cu ademas el a participa na un examen pa consehero fiscal, estableci mediante decreto nacional cu ta contene reglanan administrativo general, y a pasa esaki cu bon resultado.

E di dos categoria ta consisti di "zaakwaarnemer" (§7). Un persona cu no ta abogado pero cu ta representa of asisti personanan envolvi den casonan civil, of fungi como representante den casonan penal, haciendo esaki como su profesion, mester ta reconoci door di Corte di Husticia como "zaakwaarnemer". E Corte di Hustitia a duna di conosi cu actualmente no ta bai apunta “zaakwaarnemer” mas y Aruba actualmente tampoco no tin un “zaakwaarnemer” registra na Corte di Hustitia.

Otro leynan relevante ta e Ordenansa Nacional di Identificacion Ora di Duna Servicio (Landsverordening identificatie bij dienstverlening, of LID) y e Ordenansa Nacional di Deber di Raporta Transaccion Inusual (Landsverordening meldplicht ongebruikelijke transacties, of LMOT). E ordenansanan nacional aki ta abarca medidanan pa preveni y combati mal uzo di e sistema financiero pa laba placa obteni via medionan criminal. Den cuadra di LID, abogadonan ta obliga en principio di identifica nan clientenan. Pa mas informacion, click aki riba pa ricibi e version digital di LID. Ademas, abogadonan ta obliga di raporta cierto tipo di transaccionnan na Meldpunt Ongebruikelijke Transacties (Centro pa Raporta Transaccionnan Inusual).