Orde van Advocaten van Aruba

EN | NL | PA
Reglanan di Conducta

1. Reglanan general

Regla 1

Un abogado mester comport'e di tal manera cu e no ta perhudica confiansa den abogacia, ni den e manera cu e mes ta eherce su profesion.

Regla 2

1. Un abogado mester evita situacionnan den cua su libertad y independencia den ehercicio di su profesion lo por ta na peliger.

2. Un abogado no mag duna ni ricibi recompensa pa encargonan cu e aporta.

Regla 3

Un abogado mester tene na mente cu hopi biaha un areglo amistoso ta preferibel na luga di un proceso huridico.

Regla 4

Un abogado mester atende e encargonan cu e ricibi den un forma prudente.

2.    Relacion cu cliente

Regla 5

Ta e interesnan di su cliente mester determina e manera cu un abogado ta atende su casonan y no ningun interes personal di e abogado mes.

Regla 6

1. Un abogado tin e deber di mantene secresia; e no mester divulga informacion di casonan cu e ta trata, tocante identidad di su cliente ni tocante e naturalesa y embergadura di e interesnan di su cliente.

2. Si un abogado haya cu pa cumpli corectamente cu su encargo ta necesario pa e divulga informacion cu el a adkiri, e abogado ta liber pa hacie te asina leu cu e cliente no tin obhecion y te asina leu cu esey ta cuadra cu un ehercicio corecto di su profesion.

3. Un abogado lo impone un deber di secresia similar riba su colaboradonan y su personal.

4. E deber di secresia ta sigui existi despues cu e relacion cu e cliente termina.

5. Si un abogado priminti confidencialidad na un contrapartido of si e confidencialidad aki nace for di naturalesa di su relacion cu un tercero, e abogado lo honra e confidencialidad aki cu su cliente tambe.

Regla 7

1. Un abogado no mag tuma defensa di interes di dos of mas partido na su encargo si e interesnan di e partidonan aki ta den conflicto of probablemente lo drenta den conflicto.

2. Generalmente, un abogado cu ta defendiendo interesnan di dos of mas partido ta obliga di retira completamente for di e caso asina cu un conflicto di interes insuperabel presenta.

3. Un abogado cu a defende interes di dos of mas partido den un caso specifico y cu a retira como abogado di un of mas di e partidonan aki lo no procede den e caso ey ni den un continuacion di e caso ey contra e partido of partidonan di cua el a retira.

4. E disposicionnan den e paragrafnan anterior lo conta tambe pa tur abogado cu ta forma parti di e mesun oficina di abogado.

5. Un abogado no mag actua como tal contra un partido cu ta of a yega di ta su cliente of cliente di otro abogado di su oficina, cu excepcion di loke ta determina den e siguiente incisonan.

6. Un abogado por desvia di loke regla 7 inciso 5 ta determina solamente den caso cu:

a.      e interesnan confia of cu lo ser confia na e abogado no tin di haber cu e mesun cuestion pa cua e abogado of otro abogado di su oficina a yega di asisti of ta asistiendo e cliente of ex cliente, y e interesnan confia of cu lo ser confia na e abogado no tabatin ni tin di haber tampoco cu e cuestion ey, y no ta probabel tampoco cu esey lo sosode,

b.      ni e abogado ni ningun otro abogado di su oficina ta dispone di informacion confidencial di cualkier tipo proveniente di su cliente of ex cliente, ni informacion liga na e caso ni informacion relaciona cu e cliente of ex cliente como persona, ni su empresa, cu por ta relevante den e caso contra e cliente of ex cliente,

c.       y cu no a bini padilanti tampoco ningun otro obhecion rasonabel di parti di e cliente of ex cliente, ni di parti di e partido cu a acudi na e abogado pa pidie representa su interesnan.

7.           Si e circunstancianan describi den regla 7 inciso 6 no ta aplicabel, e abogado lo por desvia toch di loke regla 7 inciso 5 ta dispone, den caso cu e partido cu a acudi na e abogado pa pidie representa su interesnan y e cliente of ex cliente contra ken e abogado lo mester actua, bay di acuerdo cu e actuacion describi na regla 7 inciso 5 a base di informacion adecua cu nan a ricibi di antemano.

8.           E stipulacionnan di e incisonan anterior ta conta tambe pa tur otro abogado cu ta forma parti di e mesun oficina.

Regla 8

Un abogado mester pone informacion, hechonan y acuerdonan importante na conocemento di su cliente. Ora ta necesario pa evita malcomprendemento, duda of disputa, e abogado mester confirma informacion y palabracionnan importante na su cliente por escrito.

Regla 9

1. Ta e abogado tin e responsabilidad di dirigi e caso y no e cliente. Sinembargo, e no mag haci nada cu ta bay contra di e aparente boluntad di su cliente. Loke e haci ta tuma luga bou di su responsabilidad y e no por scapa e responsabilidad aki apelando na e encargo cu el a ricibi di su cliente.

2. Si tin un diferencia di opinion entre un abogado y su cliente tocante e manera cu mester trata e caso y nan no por supera e disputa den consulta mutuo, e abogado mester retira di e caso.

3. Un abogado no mag bandona un encargo na un momento inadecua, a menos cu circunstancianan oblig’e di haci esey.

4. Apesar cu un abogado bandona su encargo, e ta keda obliga di tuma e medidanan necesario pa evita cu su cliente ta sali perhudica, te asina leu cu por spera esey di dje rasonablemente.

Regla 10

1. Na momento cu un abogado duna informacion na terceronan tocante un caso cu e ta tratando of a yega di trata, e mester tene cuenta no unicamente cu e interesnan di su cliente, sino tambe cu otro interesnan hustifica. Un abogado lo no duna informacion sin autorisacion di e cliente y lo evita cualkier malcomprondemento relaciona cu e calidad den cua e ta actuando.

2. Un abogado mester actua na un manera reserva ora di pone contenido di documentonan di un procedura na corte na disposicion di terceronan.

Regla 11

Un abogado cu ripara cu el a faya den defensa di e interesnan di su cliente mester pone su cliente na haltura y conseh'e, si ta necesario, pa busca conseho independiente.

3.     Actuacion den proceduranan na corte

Regla 12

1. Carta y otro notificacionnan cu un abogado manda pa otro abogado no por wordo invoca den corte a menos cu interesnan di e cliente exigi esey explicitamente, y den e caso ey no mag invoca nan sin consulta previo cu e abogado di e contrapartido.

2. Si e consulta ey no hiba na un solucion, mester pidi conseho di e decano prome cu invoca den corte un carta of notificacion di e tipo menciona anteriormente.

Regla 13

Sin autorisacion di e abogado di e contrapartido no mag comunica na e hues of instancia cu ta husgando e caso nada tocante contenido di negociacionnan entre e abogadonan pa yega na un areglo amistoso.

Regla 14

1. Ora e dicidi na ki momento e lo presenta documentonan na e hues of instancia cu ta husgando e caso, un abogado mester tene cuenta cu e hecho cu e contrapartido mester haya chens di prepara su reaccion riba e documentonan ey cu e debido cautela, conforme e reglanan acorda entre Orden di Abogadonan di Aruba y e instancianan hudicial di Aruba.

2. Por entrega un nota di argumentacion solamente si e no ta contene nada mas cu loke e abogado presenta como argumnetacion.

3. Asina cu cuminsa pleita un caso, mester entrega un copia di e nota di argumentacionnan por escrito na e abogado di e contrapartido.

Regla 15

1. Un abogado no mag dirigie na e hues of otro instancia cu ta husgando un caso pendiente sin cu e haci esey hunto cu e abogado di e contrapartido, a menos cu e hacie por escrito y manda un copia di e comunicacion pa e abogado di e contrapartido na mes momento, cu suficiente tempo di antemano pa e abogado ey por tin suficiente chens pa reacciona riba e comunicacionnan.

2. Despues cu a pidi un sentencia, e abogado no mag dirigie mas na hues sin permit di e contrapartido.

Regla 16

1. Prome cu e interogacion, un abogado no mag tende personanan cu e contrapartido a yama of claramente lo yama como testigo.

2. Den casonan penal, e abogado lo abstene di tende testigonan previamente cu Ministerio Publico a dagvaard of convoca.

3. E stipulacionnan aki no ta conta pa su propio cliente, ni pa personanan den servicio di e cliente of cu tin un relacion special cu e cliente.

4. Relacion entre abogadonan

Regla 17

Na interes di personanan cu ta busca nan derecho y di abogacia en general, abogadonan mester haci esfuerso pa mantene un relacion mutuo cu ta basa riba confiansa y cortesia.

Regla 18

1. Un abogado lo no drenta den contacto cu un partido tocante un asunto pa cua, te asina leu cu e abogado sa, e partido ta hayando asistencia di otro abogado, a menos cu e haci esey pa medio di e otro abogado of a menos cu e otro abogado dun'e permit pa drenta den contacto directo cu e partido. Esaki ta conta tambe den caso cu ta e partido en cuestion purba drenta den contacto cu ne directamente.

2. Un abogado cu manda un notificacion cu consecuencia huridico por haci esey directamente na e contrapartido, basta cu na mes momento e manda un copia pa e abogado di e contrapartido.

Regla 19

1. Prome cu e procede na tuma medidanan ehecutorio, un abogado tin e obligacion di notifica su intencion na e contrapartido, of su abogado den caso cu e tin asistencia di un abogado, conforme instruccionnan di Corte Comun di Husticia di Aruba, Corsou, St. Maarten y Bonaire, Saba y St. Eustatius.

2. E abogado tin e obligacion tambe di notifica e abogado di e contrapartido si e tin intencion di entama un huicio sumario.

Regla 20

Un abogado no mag yama un abogado of ex-abogado cu (a yega di) ta inscribi na Corte Comun di Husticia di Aruba, Corsou, St. Maarten y Bonaire, Saba y St. Eustatius pa testigua tocante loke el a observa eherciendo su profesion di abogado, sin consulta prome cu e decano. E regla aki ta aplicabel tambe, segun analogia, na colaboradonan y personal di un abogado of ex-abogado.

Regla 21

1. Si den tratamento di un caso, un abogado duna un encargo na otro abogado, e mester para responsabel pa e pago y honorarionan corespondiente, a menos cu e haci reserva explicito tocante esey.

2. Esey ta conta tambe den casonan pa cua e abogado ta duna asistencia huridico gratuito.

Regla 22

1. Den caso cu un persona pidi un abogado asumi tratamento di un caso cu otro abogado ta tratando caba, e lo no duna su asistencia sin consulta e otro abogado prome.

2. E consulta menciona no ta necesario si el a haci sigur cu e cliente a kibra su relacion cu e otro abogado y a paga su declaracion final pa e caso en cuestion. Si no a paga e declaracion, e abogado lo no duna asistencia sin aprobacion di e otro abogado, a menos cu e persona a keda sin paga e declaracion debi cu e no tabatin moda.

3. Si e suma declara ta den disputa, e abogado por acepta pa trata e caso cu aprobacion di e decano, mara na e condicionnan cu e decano stipula.

4. Si e interesnan di e cliente ta rekeri pa duna asistencia di forma inmediato, e abogado lo pidi permit di e decano pa esey, a menos cu no tin manera pa consulta e decano na tempo.

5.     Reglanan financiero

Regla 23

1. Un abogado tin e obligacion di actua na un manera minucioso y cuidadoso den asuntonan financiero.

2. Un abogado mester evita di haci gasto innecesario, incluso pa e cliente su contrapartido.

Regla 24

1. A menos cu un abogado tin motibo solido pa asumi cu su cliente no por bini na remarke pa asistencia huridico gratuito, e tin e obligacion di consulta cu su cliente na inicio di e caso tocante si tin base pa purba obtene asistencia huridico gratuito, y despues ki ora cu tin motibo.

2. Ora un abogado ta duna asistencia huridico gratuito pa un caso, un abogado lo no acorda ni acepta pago di ningun tipo pa su trabou, cu excepcion di pago di e gastonan adicional??? conforme e reglanan aplicabel al respecto.

3. Den caso cu e cliente por bini na remarke pa asistencia huridico gratuito y sinembargo e opta pa no haci uzo di esey, e abogado mester pone esey por escrito.

Regla 25

1. Ora di determina e suma cu e lo declara, un abogado mester cobra un salario rasonabel, tumando na cuenta tur factor envolvi.

2. Un abogado ta liber pa cumbini cu e lo cobra pago unicamente si e logra un cierto resultado.

3. Un abogado mag acorda tambe cu su pago lo coresponde cu un parti proporcional di balor di e resultado logra pa medio di su asistencia.

4. Un abogado mester presenta su cuenta di tal manera cu e cliente por mira ki parti di e suma ta pa salario di e abogado y ki parti ta pa gastonan adicional. Si a ricibi of paga adelanto of compensacion di gastonan paga of otro tipo di pago, e abogado mester indica pa e cliente e sumanan corespondiente apart den su cuenta y, si ta necesario y posibel, desconta nan for di e suma di e declaracion.

Regla 26

1. Ora un abogado tuma un encargo, e mester discuti su consecuencianan financiero cu e cliente y splik'e di ki manera y cu ki frecuencia e lo entrega su declaracionnan.

2. Un abogado mester pone su cliente na haltura asina cu e premira cu e declaracion lo resulta substancialmente mas halto cu el a calcula pa e cliente inicialmente.

3. Un abogado no mag uza montantenan cu el a ricibi pa un cliente como pago pa su cuenta den caso cu nan ta pa e cliente cubri su gastonan di mantencion personal.

Regla 27

1. Si e cliente tin obhecion contra e cuenta presenta, e abogado tin e obligacion di pone e cliente na haltura di e reglanan existente al respecto.

2. Si e cliente protesta contra e hecho cu ta desconta e suma di un declaracion for di cen cu e mester ricibi, pasobra e ta disputa e declaracion total- of parcialmente, lo deposita e suma cu ta den disputa cerca e decano.

3. Si e cliente disputa un cuenta cu a wordo desconta for di e adelantonan cu el a paga, te na e grado cu mester haci un restitucion total of parcial di e adelantonan paga, e abogado lo tin e obligacion, si e cliente exigi esey, di presenta e declaracion pa ser evalua. E di dos inciso di e regla 27 aki ta aplicabel analogicamente.

4. Keda sin entrega e dossier te ora cu e cuenta ser paga ta un procedemento cu abogadonan lo uza solamente cu e debido cautela. Si e cuenta ta den disputa, e abogado lo indica na su cliente e posibilidad di deposita e suma declara cerca e decano te ora cu caba di regla e disputa.

5. Den caso cu un cliente pidi specificacion di un cuenta, e abogado mester dun'e esey. Esey no mag pone e suma di e cuenta sali mas halto cu esun original.

6. Den caso cu esaki no resulta den pago y e abogado procede na presenta su cuenta pa e wordo evalua segun ley, e mester pone e cliente na haltura di esey, incluyendo un copia di e cuenta cu el a presenta pa wordo evalua.

7. Relaciona cu debenan cu su cliente mester pag'e y cu no a ser ratifica den un procedemento legal, un abogado lo no tuma medida preventivo, ni pidi bancarota sin consulta prome cu e decano.

Regla 28

1. Un abogado no mag acepta otro forma di siguridad pa pago di su cuenta cu no ta adelanto di cen, fuera di casonan excepcional y solamente den consulta cu e decano.

2. E abogado mag desconta su cuenta for di adelanto y otro sumanan cu e tin di e cliente como deposito, pero den e ultimo caso aki unicamente te asina leu cu no tin nada ta strob’e di paga e sumanan ey na e cliente y te asina leu cu e cliente bay di acuerdo.

3. No mag di usa fondonan pa paga cuenta riba cua pa ley no por pone beslag.

6.     Reclutamento y Publicidad

Regla 29

Sin kita nada di su responsabilidad pa lei, un abogado tin mag di haci publicidad te na e grado cu esey no ta den conflicto cu e reglanan di conducta.

Regla 30

Un abogado mester percura pa publicidad cu e mes haci, of cu ta ser haci p’e, ta cuadra cu e grado di cautela cu mester por spera di un abogado corecto y cu esey no ta den conflicto cu e afan di abogadonan pa mantene un relacion mutuo basa riba cortesia y confiansa.

Regla 31

Un abogado no mag haci publicidad den cual ta compara su servicionan cu esnan di otro abogadonan.

Regla 32

1. Un abogado no mag haci publicidad acercando posibel clientenan directamente y individualmente si nan no ta su cliente caba.

2. Un abogado mester abstene di tur intento pa haci un cliente di otro abogado bira su cliente.

Regla 33

Un abogado no mag propaganda cu e ta dispone di competencianan specialisa a menos cu ta evidente cu el a adkiri e conocemento y experiencia en cuestion.

Regla 34

1. Un abogado no mag propaganda resultado di cierto casonan, ni di su porcentahe di casonan gana.

2. Un abogado no mag haci publicidad cu informacion di casonan cu e ta tratando of a yega di trata, identidad di su cliente, ni naturalesa y embergadura di e cliente su interesnan, sin autorisacion previo di e cliente.

Regla 35

Abogadonan cu haci publicidad hunto of cu terceronan, mester evita di crea e impresion cu ta existi entre nan un grado di cooperacion mas estrecho cu e ta en realidad.

Regla 36

1. E publicidad cu un abogado haci tocante su tarifa- y condicionnan mester ta cla y no ambiguo. P’esey, semper mester ta evidente na ki servicionan esakinan ta aplicabel. E publicidad tin cu duna di compronde tambe si tin adelanto of otro posibel costonan inclui den e tarifa.

2. No ta permiti pa menciona solamente prijsnan minimo den publicidad.

3. Den publicidad, un abogado no mag compara su tarifa- y condicionnan cu esnan di otro abogadonan.

4. Un abogado ta obliga di aplica e tarifa- y condicionnan cu e propaganda.

Regla 37

Propaganda di un abogado no mag crea e impresion cu un otro ta responsabel p’e.

Regla 38

Un abogado no mag menciona den propaganda, a menos cu ta trata di su propio website, den ki funcionnan el a yega di ser nombra pa un instancia hudicial, funcionnan cu el a yega di ocupa den poder hudicial, ni funcionnan cu e ta ocupa den e Orden di Abogado.

7.      Algun regla pa practica legal

Regla 39

Den su contacto cu terceronan, un abogado mester evita malcomprondemento tocante e calidad den cua e ta fungi den un situacion particular.

Regla 40

Un abogado mester abstene di facilita datonan di cua e sa, of por lo menos lo mester sa, cu nan ta incorecto.

Regla 41

Ni den forma verbal, ni por escrito, un abogado mag expresa su mes di maneranan innecesariamente ofensivo.

Regla 42

1. Si tratando un caso un abogado pidi servicio di terceronan of yama testigo, e mester para responsabel pa e pago y honorarionan cu ta coresponde na nan, a menos cu e haci reserva explicito tocante esey.

2. E disposicion den inciso 1 no ta conta den caso cu e abogado invita un persona pa fungi como arbitro of consehero vinculante.

3. E stipulacionnan den e incisonan anterior ta conta tambe den casonan pa cua e abogado ta duna asistencia huridico gratuito.

Regla 43

1. Un abogado mester percura pa su oficina ta organisa y ekipa conforme lo necesario pa por eherce su profesion na un manera adecua.

2. Generalmente, un abogado mester ta alcansabel durante oranan regular di oficina. Den su ausencia e mester percura un remplaso adecua den su practica.

3. Un abogado mester actua cu minuciosidad y cautela den asunto di placa.

4. Tur placa ricibi mester ser entrega mas pronto posibel na esun cu tin derecho di hay’e.

5. Si ta necesario pa e abogado keda cu fondonan di su cliente of di terceronan pa hopi tempo, e tin cu percura pa e fondonan aki keda disponibel na tur momento y pa nan no mescla cu su propio fondonan.

Regla 44

1. Un abogado cu ta ocupa un funcion den cualkier colegio encarga cu hurisdiccion of solucion alternativo di disputa lo abstene di tur clase di envolvimento den cualkier caso den cua e ta traha, a yega di traha of lo bira envolvi den tal funcion.

2. Un abogado cu ta forma parti di un kantoor di abogado no tin mag di tin envolvimento cu ningun caso cu ta ser of a ser husga pa un colegio den cua un abogado cu ta parti di e mesun kantoor ta ocupa un funcion, si e abogado ey ta of lo bira envolvi den e colegio su tratamento di e caso.

Regla 45

Un abogado por acepta un encargo di un intermediario cu no ta inscribi como abogado solamente si e ta convenci cu a dun'e e encargo cu aprobacion di e cliente y si ademas el a reserva e derecho di por consulta directamente cu e cliente na cualkier momento.

Regla 46

1. Un abogado no mag permiti otro persona scucha un combersacion hunto cu ne na telefon, ni graba contenido di un combersacion riba un medio di audio sin notifica previamente esun cu kende e ta papia.

2. Den caso cu graba un combersacion cu otro abogado riba un medio di audio cu su consentimento, regla 12 lo aplica segun analogia.

Regla 47

Den caso di un investigacion disciplinario of un solicitud di e decano pa informacion relaciona cu un posibel investigacion disciplinario, e abogado contra kende e investigacion of control ta dirigi ta obliga di facilita tur informacion solicita inmediatamente, sin por hasi uso di su deber di secresia, cu excepcion di casonan excepcional. Un abogado cu ta evaluando di apela na existencia di un caso excepcional mester consulta cu e decano.

Regla 48

Un abogado tin mag di laga miembronan di su personal cu no ta inscribi como abogado, trata caso solamente si e ta convenci cu nan ta capaz pa haci esey, si el a defini e limitenan denter di cua nan mag actua y si esey tuma luga bou di su supervision. E ta keda responsabel na su cliente pa e manera cu a trata e caso y e consehonan duna.